Izenburua: Bizimodu jasangarrien aldeko Herri auzitegia

Egilea: Mugarik Gabe & Tipi tapaBagoaz

2018ko otsailaren 23 eta 24an Bilbon ospatu zen Bizitza Jasangarrien Eskubidearen Aldeko Herri-Auzitegia. Auzitegi hau kolektibo anitzek (Garapenerako Gobernuz Kanpoko Erakundeak, sindikatuak, mugimendu sozialak) sarean egindako lanaren emaitza izan zen. Mahai gainean jarri eta salatu zituen mundu osoan ematen diren Bizitza Jasangarriekin loturiko Giza Eskubideen urraketak. Horrela, Euskal Herria, espainiar estatua, Mendebaldeko Sahara, El Salvador, Argentina eta Mexikoko testigantzak aurkeztu ziren.

Argitalpen honek adituek eta fiskaltzak azaldutako txostenak, aurkeztutako kasuen laburpenak eta epaimahaiak emandako ebazpena jasotzen ditu. Auzitegi honek hainbat helburu bete dituelakoan gaude: salaketa, memoria berreskuratzea, munduko zenbait tokitan bizitzaren defentsan ematen diren erresistentzia eta protesta prozesuei elkartasuna adieraztea eta baita erreparazio sinboliko bat izatea giza eskubideen urraketa hauek pairatu dituzten pertsonentzat.